Hari amahirwe yo kwakira Grammys! Abayobozi b’umuryango ‘The Recording Academy’ utegura ibihembo bya Grammy basuye Bk Arena
Abayobozi b’umuryango utegura ibihembo karundura ku Isi ‘Grammys’ bagaragaye i Kigali mu Rwanda, aho baje gusura inzu yakira ibikorwa by’imyidagaduro izwi nka Bk Arena. Ni igikorwa cyashimishije ubuyobozi bw’iyi nyubako kuko bayishimye hashobora kuzatangirwa ibihembo bya Grammy ya Afurika n'Uburasirazuba bwo Hagati.
Ku munsi wo ku wa Kabiri, tariki ya 18 Kamena 2024 abayobozi b’umuryango ‘The Recording Academy’ utegura ibihembo bya Grammy, basuye inyubako ya Bk Arena, ahashobora kuzatangirwa ibihembo bya Grammy yahariwe Afurika n'Uburasirazuba bwo Hagati.
Mu minsi ishize, ubuyobozi bw’umuryango ’The Recording Academy’ bwahamije ko bugiye gutangiza ku mugaragaro ishami rishya ry’ibihembo bya Grammy byahariwe umugabane w'Afurika n’Uburasirazuba bwo Hagati. Hari imijyi yatangiye guhabwa amahirwe ko izakira igitaramo cya mbere cy’itangwa ryabyo. Hahawe amahirwe imijyi irimo inyubako zakwakira ibyo birori; Kigali, Nairobi, Lagos na Johannesburg.
Abayobozi b’uwo muryango ’The recording Academy’ barimo; Panos A. Panay na Harvey Mason Junior basuye inyubako ya Bk Arena nkuko byasangijwe abantu ku rukuta rwa X rw’iyo nyubako.
Bagize bati:”Ibihembo bya Grammy mu nyubako (Bk Arena)! Hashimwe cyane umuyobozi w’umuryango ‘The Recording Academy” utegura ibihembo bya Grammy, Harvey Mason Jr n’itsinda rye, basuye inyubako ya Bk Arena. Twagiranye ibihe bitangaje kandi twabikunze.”
“Twizeye kuzongera kubabona mwese vuba!”
Mu mashusho yagaragaye ku rukuta rwa X rw’inyubako Bk Arena, agaragaza ko yasuwe n’abayobozi b’umuryango ‘The Recording Academy’ utegura Grammys barimo Harvey Mason Jr na Panos A. Panay.
Iyi nyubako ya Bk Arena, bayisuye mu mujyo wo kureba umujyi wo muri Afurika ufite inyubako ihiga izindi mu kwakira ibirori. Ubwo irahatana n’izindi nyubako zirimo izo mu mijyi nka Nairobi muri Kenya, Lagos muri Nigeria, Durban na Johannesburg muri Afurika y’Epfo, Rabat muri Maroke (Morocco) na Cairo muri Misiri (Egypt). Bk Arena niyemezwa, izakira itangwa rya mbere ry’ibihembo bya Grammys byahariwe Afurika bizitwa ‘Grammy Africa and The middle East Awards.’
Nyuma y'imyaka ibiri (2) biganirwaho, umuryango 'The Recording Academy ' utegura ibihembo bya Grammy wemeje ko ugiye kwagurira ibikorwa byawo ku mugabane w'Afurika no mu Burasirazuba bwo Hagati biciye mu kuhateguriramo ibihembo byaho byihariye bizitwa 'Grammy Africa and the Middle East Awards.'
Icyo cyemezo cyo kwagurira ibihembo bya Grammy muri Afurika n'Uburasirazuba bwo Hagati cyakiriwe neza n'abayobozi, abahanzi ndetse n'abakunzi b'umuziki bari banyotewe no kubona abahanzi babo batwara Grammy. Binubiraga ko batazirikanwa mu muziki nkuko abo ku mugabane w'Amerika y'Amajyepfo bazirikanwa; bashyiriweho igihembo cyabo cya Grammy kizwi nka 'Latin Grammy Awards.' Billboard igaragaza ko 'Latin Grammy Awards ' yatangiye gutangwa ku wa 13 Nzeri 2000.
Ubuyobozi bwa Bk Arena bwishimiye kwakira abayobozi b'umuryango 'The Recording Academy' utegura ibihembo bya Grammy
Abasuye Bk Arena barimo Harvey Mason Jr
