Tanzania: Abarokoye abari mu ndege, bashinje guverinoma kubirengagiza

Abafashije Majaliwa kurokora abari mu ndege yaguye muri Victoria, barasaba guverinoma kubibuka.

Nov 11, 2022 - 20:13
Nov 11, 2022 - 20:26
 0
Tanzania: Abarokoye abari mu ndege, bashinje guverinoma kubirengagiza


Ku wa 06 Ugushyingo 2022 nibwo indege ya kompanyi ya Precision Air yakoreye impanuka mu kiyaga cya Victoria, abarobyi bakorera muri icyo kiyaga barokoye abagera kuri 24. Umusore umwe Jackson Majaliwa yashimiwe na Perezida wa Leta Zunze Ubumwe za Tanzania, Madamu Samia Suluhu, akaba yarasabye ko Majaliwa yakwinjizwa mu ngabo zishinzwe ubutabazi.  Yahembwe kandi n'Intekonshingamategeko ya Tanzania  aho yamuhembye milyoni 5 z'Amashilingi ya Tanzania. Yongeye guhembwa n'ikipe ya Young Fc, moto. Bagenzi be bamufashije gukingura urugi rw'indege, bikaba byarafashije abarimo gusohoka, bakajyanwa ku nkombe, ntibigeze bazirikanwa. Byatumye bajya mu itangazamakuru basaba guverinoma kwibukwa.


Igitangazamakuru, Mwananchi, gikorera muri Tanzania, cyatangaje ko abafashije Majaliwa ari abasore batatu ari bo Sadam Sadath, Ally Athuman na Jost Festo. Ubahagaririye Sadam Sadath yatangaje ko Jackson Majaliwa atari gukora ubwo butabazi bwakijije abagera kuri 24 wenyine. Bavuga ko na bo bakwiye kwibukwa, bagahembwa nk'uko Majaliwa yahembwe.


Aba basore basabye Leta kubongerera ubumenyi mu kurokora abantu barohamye. Ngo byazabafasha kuba batanga umusanzu mu gukiza ubuzima bw'abatari bake.


Jackson Majaliwa wahembwe, yari umurobyi akaba n'umucuruzi w'indagara hafi y'ikiyaga cya Victoria. Leta yavuze ko igiye kumuhindurira ubuzima abikesha ubwo butabazi yakoze nta gihembo ateganya, ineza umuntu ayisanga imbere.


Iyo ndege yakoze impanuka mu gitondo cyo ku wa 06 Ugushyingo 2022, ni igihe yarivuye i Dar Es Salaam ikaba  yariteguraga kugwa ku kibuga cy' indege cya Bukoba cyiri hafi ya Victoria, Tanzania. Iyo ndege yahise ikora impanuka igwa mu kiyaga cya Victoria; yahitanye abagera kuri 19, harokotse 24.

Niyonkuru Augustin He is a journalist. For more information, please contact him; +250781548774.